aarazuue.n hazaar rakhate hai.n

aarazuue.n hazaar rakhate hai.n
to bhii ham dil ko maar rakhate hai.n
barq kam hausalaa hai ham bhii to
dil ek beqaraar rakhate hai.n
Gair hai muuraad-e-inaayat haa_e
ham bhii to tum se pyaar rakhate hai.n
na nigaah na payaam na vaadaa
naam ko ham bhii yaar rakhate hai.n
ham se Khush zam-zamaa kahaa.N yuu.N to
lab-o-lahajaa hazaar rakhate hai.n
chhoTe dil ke hai.n butaa.N mashhuur
bas yahii aitabaar rakhate hai.n
phir bhii karate hai.n "Meer" saahib ishq
hai.n javaa.N iKhtiyaar rakhate hai.n